Faraldo acusa a Lagares de torpedear na Deputación todos os seus proxectos

Inicio

Escrito por El Ideal gallego

A alcaldesa de Betanzos, María Faraldo, acusou onte ao deputado provincial e concelleiro na corporación brigantina, Antonio Lagares, de aproveitar a mínima oportunidade para torpedear na Deputación todos os proxectos que deseña o equipo de goberno que ela preside.

O Partido Popular de Betanzos, a través dun comunicado asinado por María Faraldo, denunciou a negativa do responsable de Economía e Facenda da Deputación, Antonio Lagares, de conceder ao municipio unha axuda de case 120.000 euros para levar a cabo un proxecto de novas tecnoloxías que, segundo a primeira edil, beneficiaba a todos os núcleos do municipio, e de forma especial, á zona rural.

Faraldo indica que se trataba dun proxecto para a adquisición de portátiles, ordenadores, impresoras e cableado de rede de datos, cableado de rede eléctrica dos centros sociais e un plan de formación para organizar cursos.

A rexedora engade que o proxecto presentado polo Concello brigantino optaba a ser financiado pola Deputación a través do remanente do crédito de investimentos do ano 2007. Nunha primeira fase, prosegue Faraldo, o propio deputado aceptou a proposta exposta a través do grupo provincial do Partido Popular.

Con todo, á hora da verdade, no momento incluírse os proxectos para a súa aprobación na próxima sesión plenaria, foi o deputado betanceiro quen retirou o proxecto do seu municipio, quedándose Betanzos e a súa zona rural sen un proxecto ambicioso e co que se pretendía achegar aos centros sociais novas ferramentas para facilitar o acceso ás novas tecnoloxías?, dixo a primeira edil.
O PP cualifica de lamentable a actitude do responsable de Facenda e acúsao de aproveitar a mínima oportunidade para trabar os proxectos municipais.