O Ideal Galego.  A alcaldesa de Betanzos, María Faraldo, presentou onte o programa da X Feira Franca Medieval. A principal novidade está destinada aos nenos. Así se organizou unha ruta a través do casco histórico para achegar a historia medieval da cidade aos máis pequenos.

A ruta, que está dirixida a nenos de entre cinco e dez anos, abrirá os actos da X Edición da Feira Franca Medieval, o vindeiro xoves, e partirá ás 11.00 horas do edificio Liceo. O director do Museo das Mariñas, Alfredo Erias, fará de cicerone dos máis pequenos, que tamén estarán acompañados por varios monitores, no percorrido polo casco histórico. A finalidade desta nova iniciativa é, en palabras da alcaldesa brigantina, "que coñezan a historia de Betanzos no medievo e os seus monumentos máis importantes dunha forma didáctica e divertida". Os participantes deberán ir ataviados con roupas de época, aínda que desde o consistorio facilitaranse algúns complementos medievais.

Orzamento > A apertura oficial da feira, no entanto, terá lugar o venres 6 de xullo, coa tradicional entrada do conde de Andrade e o seu séquito na cidade e a lectura do pregón, a cargo do escritor e historiador Luís Gorrochategui Santos.

O orzamento estimativo dos festexos ascende a 60.000 euros, segundo indicou onte a alcaldesa, quen sinalou igualmente que se manteñen os actos principais de edicións anteriores.

Un dos cambios afectará á tradicional representación da entrega das Cen Doncelas, que se traslada á praza da Constitución, en lugar de celebrarse no Paseo da Galera.

O Concello deseñou un dispositivo especial de vixilancia e seguridade para os tres días que duran os festexos.

En total acudirán 130 artesáns das diferentes especialidades e haberá numerosos postos de gastronomía.

---

Email (non sera publicado)

Nome

Titulo do comentario

Comentarios
 _EASYCOMMENTS_REMAINING_CHARS

Enviar