Luns, 23 Marzo 2009 19:11
(EFE).- A Mesa pola Normalización Lingüística realizará este sábado no Auditorio de Galicia, en Santiago de Compostela, unha asemblea xeral de socios na cal, entre outros puntos, elixirá a comisión permanente para os próximos tres anos e debaterá unha proposta de modificación dos seus estatutos.
A única candidatura presentada para dirixir a organización é continuadora da actual, con Carlos Callón como presidente, Fran Rei como vicepresidente e coordinador de zonas, Iria Taibo como secretaria xeral e Susana Romero como vocal.
Ademais da comisión permanente, con funcións máis executivas, na asemblea xeral proporase a creación dunha xunta directiva que estará constituída polos membros da comisión permanente, os responsables das diferentes seccións da Mesa e os coordinadores das zonas.
A Mesa celebra esta asemblea nun momento que considera, segundo se indica nun comunicado, "especialmente delicado" para a situación da lingua galega.
Así, o principal reto formulado para o futuro próximo "é evitar o desmantelamento da protección xurídica do galego".
Para iso, desde a Mesa faise un chamamento ao conxunto da sociedade, especialmente á comunidade educativa, "porque se os galegos non defendemos a nosa lingua, ninguén o vai facer por nós".
Con este obxectivo, a Mesa convocará unha manifestación para o próximo 17 de maio, segundo se indica no comunicado.
A Mesa pola Normalización Lingüística conta actualmente 3.500 socios, o que a converte na maior asociación cultural galega en afiliación. Desde a última asemblea xeral, hai doce meses, 280 persoas solicitaron a alta na organización.
Para aumentar a súa afiliación, a Mesa puxo en marcha unha nova campaña para lograr máis socios co lema "Fas máis falta que nunca". EFE
| < Anterior | Seguinte > |
|---|