|
O Concello de Arzúa organiza o Concurso:
Palabra máis bonita.
Dentro das diferentes actividades conmemorativas do Día das Letras Galegas, que se celebrará o vindeiro xoves 17 de maio, dende o departamento de Cultura do Concello de Arzúa convidámosvos a elixir a palabra máis fermosa do galego. Entre todos os que nos fagades chegar a vosa sortearemos dez libros coa vida e obra da poetisa noiesa María Mariño, a homenaxeada deste ano.
Un ano máis, a Concellería de Cultura arzuá organiza unha convocatoria popular para elixir a palabra máis fermosa do Galego. Deste xeito, o Concello de Arzúa quere celebrar o vindeiro Día das Letras Galegas cunha homenaxe na que, máis que honrar a autores ou obras en particular, pretende render tamén un tributo á palabra.
Baixo o lema Tes a Palabra, o departamento de Cultura quérevos animar a todos os veciños e veciñas de Arzúa a participar nesta iniciativa, que consiste en que cada un de vós elixa a palabra que considere que é a máis bonita do noso idioma. Para facérnola chegar tedes á vosa disposición tres vías:
* Escribir a palabra nun folio xunto cos vosos datos persoais (nome, apelidos, enderezo e teléfono de contacto), dobrar o papel e depositalo no buzón instalado na planta baixa da Casa do Concello con motivo desta convocatoria
* Enviar un correo electrónico a
Este enderezo de correo-e está protexido contra spam bots, necesitas ter o Javascript activado para podelo ver
, no que deben constar os mesmos datos que se precisan no caso anterior
* Cubrir o formulario que aparece nesta mesma páxina
Xunto coa palabra elixida, cada participante deberá argumentar o porqué da súa elección, relacionándoa coa súa fonética, etimoloxía, ritmo, harmonía, gracia, sonoridade etc... antes que co seu significado, aínda que non importa que nela conflúan as dúas valoracións.
O prazo para participar remata o 16 de maio e os resultados faranse públicos a través desta web ao día seguinte, 17 de maio de 2007. Entre todos os participantes a Concellería de Cultura sorteará dez libros da vida e obra de María Mariño, poetisa noiesa homenaxeada este ano no Día das Letras Galegas.
Os únicos requisitos que debe reunir a palabra elixida son os de que esta non sexa un nome propio e que figure entre os centos de miles de termos que recollen os diccionarios de lingua galega.
Dende o Concello de Arzúa quérese animar a todos os veciños e veciñas a participar neste xogo lúdico, lingüístico e literario que non persegue outro obxectivo máis que render unha homenaxe ao noso idioma por parte de todos os que nos identificamos con el.
» Sin Comentarios
» Envie seu comentario
|
