Blogs

Detén a un home en Bergondo como presunto autor dun incendio Forestal

Fonte: Administrator

A Policía Autonómica xa detivo a 22 supostos incendiarios no que vai de ano

Funcionarios da Xefatura Provincial da Unidade do Corpo Nacional de Policía adscrita á Comunidade Autónoma de Galicia na Coruña informaron hoxe da detención de A.C.S., un home de 79 anos, como presunto autor dun incendio forestal que aconteceu no concello de Bergondo (A Coruña).

O lume que se lle imputa tivo lugar o pasado día 23 de febreiro, e nel resultaron afectadas 0,3 hectáreas de monte arborado e raso, das que 0,10 eran de castaños e piñeiros. As lapas iniciáronse a causa da neglixencia na realización dunha queima de restos forestais na que non se adoptaron as medidas de seguridade prescritas. Isto permitiu que o lume, ao levantarse un golpe de vento, se propagase ata unha zona arborada próxima, dando lugar a un incendio que fixo necesaria a presenza dos servizos de extinción da Xunta de Galicia.

Por estes feitos, instruíronse dilixencias que se remitiron ao Xulgado de 1ª Instancia e Instrución de Betanzos. Con esta detención, a Policía Autonómica xa ten posto a disposición xudicial no que vai de ano a 22 persoas por delitos relacionados cos incendios forestais.