Os milleiros de persoas que participan na marcha deixarán pequena a praza da Quintana, onde se lerá o manifesto.

Manifestación histórica en defensa da lingua

 Milleiros de persoas, éxito rotundo, a meirande concentración en defensa da lingua que nunca se celebrou en Galiza. Baixo a chuvia intermitente, a poalla e algunhas raiolas de sol, a marcha convocada para demandar o dereito dos galegos a usar a lingua propia do país en todos os ámbitos partiu ás doce e media dunha Alameda ateigada. Uns minutos antes escampara, e o sol pareceu dar o sinal para o comezo da festa; "xornada de festa e de reivindicación", dixo Ana López Suevos, lembrando unha das razóns que motivan a masiva participación na marcha: os plans do novo goberno para a lingua, comezando pola súa intención declarada de anular o decreto do ensino.

Contra á unha do mediodía, cando a cabeceira da manifestación regresaba xa á praza de Galicia, lista para entrar na zona vella despois de percorrer as rúas do Ensanche compostelán, unha boa parte dos participantes aínda enchían o paseo central da Alameda. As cifras virán despois (vinte mil, trinta mil, cincuenta mil persoas?), pero o éxito da convocatoria é incontestábel. Á unha, de novo chuvia a ballón, e a cabeceira da manifestación, con centos de raparigos, achégase á Quintana.

Vieiros: